Jig Jiga (W,N)- Wararka ka imanaya magaalada Qabri-dahare ee dhulka ismaamulka Soomaalida Itoobiya ayaa sheegaya in haweenay dhallinyaro ah meykeeda laga heley meel saldhig ciidan ah oo sida la sheegay lagu xidhay mar sii horeysay.
Maxamed Xiis Kallane oo gabadha adeerkeed ah, kuna sugan magaalada Pretoria ee Koonfur Afrika ayaa BBC-da u xaqiijiyay geerida gabadha, wuxuuna sheegay in gabadha ay qabteen ciidanka maamulka, saacado markii ay hayeena ay reerka ku wargaliyeen in ay is dishay.
Maxamed Xiis waxa uu intaas ku daray in xalay gabadha meydkeeda la geeyay isbitaalka ciidammada federaalka, kadibna lasoo xaqiijiyay in la dilay.
Gabadhan oo lagu magacaabo Taysiir Cumar Maxamed Cilmi Salal, waxa ay jirtay 20 sano, waxayna u shaqaynaysay dowladda hoose ee magaalada Qabri-dahare, gaar ahaan xaafadda shanaad.
Lama oga sababta loo xidhey markii horeba, iyo waxa sababay dhimashadeeda. Waxaase la sheegay in arrintan ay ka dhacday xero ay ciidamada ku leeyihiin magaalada.
“Qoladan meesha joogta, kuwa wax maqlaya ma aha, baaqna looma diri karo, dhibaatadan alle ha naga dulqaado, tii ugu horeysay ma aha, tii ugu dambeysayna ma aha, dilkana hala joojiyo, waa ceeb kusoo korortay Soomaalida” ayuu yidhi Maxamed Xiis Kallane oo ku hadlay magaca qoyska gabadha ay ka baxday.
Maamulka dowlad deegaanka ayaanan weli wax war ah kasoo saarin dhacdada Taysiir.
Baraha bulshada ayaa aad loogu faafinayaa qoraalo iyo haddalo looga soo horjeeda falka dhacay, waxaana arrintan ka dhashay dareen cadho leh.