Hargeisa(wjn):-Dhowr ka mid ah ragga ugu qanisan uguna saameynta badan waddanka Sucuudi Carabiya ayaa la sii daayay kaddib markii ay isfagarad dhaqaale la gaareen mas’uuliyiinta waddankaasi.
Raggan ayaa lagu soo qabtay howlgal nadiifin ah oo ka dhan ah musuq maasuqa lana bilaabay Nofeembartii la soo dhaafay.
Waxa ay ka mid ah ahaayeen in ka badan 200 oo amiir, bilyaneerro iyo saraakiil lagu hayay hoteelka Ritz Carlton ee magaalada Riyaad, kaas oo lagu wado in dib loo furo 14-ka bisha Febraayo.
Sacuudiyiinta ayaa dhammaadka howlgalkan waxa ay rajaynayaan inay ku xoojiyaan dhaqaalaha dalka ugu yaraan 100 bilyan oo doolar.
Dadkan awoodda badan ee la soo daayay ayaa waxaa ka mid ah Waalid Al-Ibraahim oo ah milkiilaha taleefishinka Carbeed ee MBC ee ah midkii ugu horreeyay ee si gaar ah loo leeyahay.
BBC-da ayaa waxaa loo sheegay in ninkaasi uu haatan dib ugu laabtay qoyskiisa oo deggan magaalada Riyaad.
Lama shaacin faafaahin dheeraad ah oo ku saabsan heshiiska kama dambeystii ay mas’uuliyiinta waddankaasi raggaasi ku sii daayeen.
Balse waxaa jira warar sheegaya in ninkaasi lagu sii daayay saamiga uu ku leeyahay taleefishinka MBC, kaas oo ah midka weli ugu ballaaran shirkadaha warbaahinta ee ka jira Bariga Dhexe.
Dhaxalsugaha boqortooyada Sucuudiga Amiir Maxamed bin Salmaan ayaa waday howlgal nadiifin ah oo ka dhan ah musuq maasuqa waxaana la rumaysan yahay in dano shakhsiyadeed uu ka lahaa wadaxaajoodyada ka socday hoteelka Ritz Carlton.
Ugu yaraan saddex qof oo kale oo caan ah ayaa sidoo kale ka mid ah ragga la sii daayay kaddib markii heshiis lala galay.
Waxaa ka mid ah Khaalid Al-Tuwaijiri, kaas oo mar madax ka ahaa maxkamadda boqortooyada xilligii Boqor Cabdallah.
Dadka weli aanan heshiiska gelin ee xabsiga loo taxaabi rabo waxaa ka mid ah ninka qaniga ah ee Alwaleed bin Talal kaas oo diiday in xoriyaddiisa uu ku iibsado inuu bixiyo lacago badan.
Hargeisa Office
Wajaalenews.Net
Wariye:Abdulkadir Habane