Gudaha Ka akhri: Guddoomiye Maxakamadda Degmada Hargeysa Garsoore Cabdirashiid Beergeel Oo Ku Dhawaaqay Xukun Iyo Ganaax Lagu Riday Eedaysaneyaal Lagu Qabtay Iyaga Oo Daabulaya Tahriibeyaashan+Magacyadooda Iyo Summada BaabuurtoodaCabdirashiid-Beergeel
Hargeysa (W,N)- Maxkamadda Degmada Hargeysa, ayaa xukunno iyo ganaax kala duwan ku riday afar nin oo lagu helay dambiyo ah in ay dad Itoobiyaan ah tahriibintooda ganacsadeen. Guddoomiyaha Maxkamada Degmada Hargeysa Cabdirashiid Maxamed Xirsi (Beer-geel) oo xukunkan ku dhawaaqay ayaa sheegay in Cabdillaahi Cabdi iyo Daahir Jun-juus oo ahaa mulkiilayaal gawaadhi Noha ah lagu qabtay in ay ka ganacsadeen tahriibinta dadka, isla markaana Maxkamaddu ku xukuntay midkiiba hal sanno iyo saddex milyan (3,000,000) oo Somaliland shilling ah. Garsoore Beer-geel waxa kale oo uu sheegay in laba darawal oo gawaadhidan waday, isla markaana dalka soo geliyey 47 tahriibayaal Itoobiya ka soo jeeda lagu xukumay midkiiba lix bilood iyo hal milyan. “Maxkamadda Degmada Hargeysa waxa ay xukuntay maanta [shalay] 11/5/2016 dambiilayaasha kala ah: Khadar Mahdi Maxamed ina Yusur Faarax Da’diisu 23 jir tahay, watay/Noha-No 66608.
Cadnaan Maxamed Jaamac Ina aamina Cabdi Da’diisu tahay 30 jir, watay Noha-No 50508, kuwaasoo ku gefay Xeerka Socdaalka 72 ee soo baxay 27/11/1995, qodobadiisa 17aad, 30aad, 37aad farqadaha K-T-D.
Waxa lagu xukumay dambiilayashaa mid kasta lix bilood (6) oo xadhig ah iyo ganaax lacageed oo dhan hal milyan (1,000,000 Sh. Sl) oo wada socda.
Xukunkan waxa loo cuskaday xeerka socdaalka 72 ee 27/11/1995 qodobadiisa 37aad, 30aad iyo 17aad farqadihiisa K.T.D iyo 70-71-72-74-75-80-81-101-103-104-108-119-120-121-149-68-172 ee Xeerka Habka Ciqaabta. Xadhigu waxa uu uga bilaabmayaa maalinta la soo xidhay oo ahayd 23/04/2016. Xukunkan waxa lagu dhawaaqay maanta 11/5/2016,” ayaa lagu yidhi xukunka Maxkamaddu soo saartay oo uu ku saxeexnaa Guddoomiyaha Maxkamada Degamada Hargeysa Cabdirashiid Maxamed Xirsi (Beer-geel).