Hargeysa (W,N)-Safiirka Dalka Shiinaha ufadhiya Soomaaliya Amb. Qin Jian ayaa Maanta booqasho ku yimid Caasimadda Somaliland Ee Hargeysa.
Amb Qin Jian ayaa waxa Garoonka diyaaradaha ee Caasimada Hargeysa ee Cigaal International kusoo dhaweeyay Masuuliyiin ka mid ah Wasaaradda Arrimaha dibedda ee Somaliland, kuwaasi oo u soo galbiyey gudaha Caasimadda, sida xogaha laga helayaan sheegeen.
Safiirka dawladaha Shiinaha ee Soomaaliya oo Fadhigiisu yahay Magaalada Muqdisho ayaan ujeeddada socdaalkiisa la ogayn, wallow Uu Socdaalkiisa ku soo beegmayo bil uun ka dib markii Dawladda Somaliland si rasmiya u shaacisay inay xidhiidh la samaysay dalka Taiwan oo Shiinaha ka go’day, arrintaasi oo uu Shiinuhu aad uga cadhooday.
Sidoo kale Amb Mr. Qin Jian ayaa si khaas ah Baraha uu Bulshada ku leeyahay, gaar ahaan Twitter-ka ku baahiya hadallo uu ku muujinayo sida Dawladdiisu uga horjeeddo xidhiidhka Somaliland la samaysay Taiwan, sidoo kalena sidii xidhiidhkaa loo curyaamin lahaa kulamo kala yeeshay Madaxweynaha Soomaaliya Maxamed Cabdillaahi Farmaajo.
Illaa hadda lama oga in Safiirku arki doono Madaxweynaha Somaliland Muuse Biixi Cabdi iyo in kale.
WAJAALENEWS DESK
HARGEISA OFFICE