Jose Alberto Mujica Cordano wuxu ahaa madaxweynihii 40aad ee Uruguay,
(Dalka Uruguay wuxu ku yaala Laatiin Ameerika; waxaanu u dhexeeyaa Brazil
iyo Argentina.)
Madaxweyne Jose wuxu xillka madaxweyne nimada hayay muddo 5 sanadood ah
oo ahayd 2010-2015. Intii aanu madaxweynaha noqon wuxu lahaa soyaal
siyaasadeed oo dheer.
Sanadadii 70-taneeyadii iyo 80-taneeyadii wuxu ka mid ahaa hogaami yeyaashii
jabhaddii Tupamaros ee la dagalamaysay xukuumaddii kelideed taliska ahayd ee
Uruguay. Isaga oo halganka ku jira ayaa la qabtay; waxaanuu xidhnaa 13
sanadood. Intii uu xidhnaana waa la jidh dilay.
Ka dib markii Uruguay laga xoreeyay xukunkii kelidii taliska ahaa ayaa xabsigii
laga soo daayay oo ka mid noqoday xukuumaddii cusbayd ee la dhisay. Waxaanuu
xukuumadahaa ka noqday wasiirka beeraha, wasiirka xanaanada xoolaha, iyo
wasiirka kaluumaysiga.
Wuxu madaxweyne nimada ku guulaystay doorashadii 2009 kii. Waxaanuu xillka
la wareegay 2010 kii; isaga oo hayay ilaa 2015 kii. Mudadaa uu xillka hayayna
waxa loo bixiyay naanays ah: Madaxweynihii Saboolka Ahaa.
Naanaystaana waxa loogu bixiyay isaga oo intii uu madaxwenaha ahaa ku noolaa
guri yar oo uu leeyahay oo ku yaala beertiisa; qasriga madaxtooyada u shaqo tegi
jiray, hase yeeshe, diiday in uu ku noolaado.
Waxa kale oo diiday in uu ku shaqo tego baabuurtii qaliga ahayd ee
madaxtooyada; oo wuxu ka door biday in uu ku shaqo tego babuur Volkswagen kii
la odhan jiray ‘iga siimi’ ee aadka u yaraa.
Ka dib markii uu madaxweyne nimaddii ka degay, Baabuurkii Volkswagen ka
ahaa nin Carbeed oo ganacsada ayaa u dhigay in uu ka siisto hal milyan oo doolar
($1,000,000). Qiimaha baabuurka wuxu ahaa $1,800 oo doolar.
Iibkaa qaaliga ha ee loo dhigayna wuu diiday in uu ku iibiyo Volkswagen kii; isaga
oo yidhi lacagtaasi uma dhiganto eygayga lugta la’ ee aan ku qaado baabuurka yar.
Boqolkii ba sagaashan (90%) mushahaaradiisa, oo ahayd bishii $12,000, wuxu u
bixin jiray deeq uu ugu deeqo jimiciyada khayriga ah iyo ganacsatada yaryar.
Intii uu madaxweynaha ahaa iyo ka dibba, hantida uu yeeshay, marka laysu geeyo,
waxay noqotay $322,880 oo doolar. Waxana ku jira hantidaa beerta iyo guriga
(labada qol ah) oo lagu qiimeeyay $108,000; kuwaas oo aanu isagu lahayn ee
xaaskiisu dhaxal u heshay.
Allahayow adaa weyn! Ilayn waa madaxweyne in uu hantida dadkiisa boobo, ama
wuxuu urursada, aanay dhaqan u ahayne, waxa hantida kaydka u ahi (mushahaaro,
hawlgab, abaalmarin, iwm) isugu ururtay $214,880.
Waa lagu daydaa ruux hadduu doobir leeyahay eh
Bal dayaay duqaa madaxda ee daacadnimo yeeshay!!!
Madaxweynii hore ee Jose Alberto Mujica Cordano.
Prof: Cabdisalaan Yaasiin