Hargeysa ( Wajaalenews)- Akhyaarta Milgaha iyo maamuuska mudan ee ku xidhan degelkan (Hubaal Media), waxaanu Halkan idiinku soo gudbinaynaa Meeris ku suntan wacyiga haatan jira iyo dhalan-gediga ku yimi mas’uuliyadda uu Alle (SW) u qeyday nolosha addoomihiisa iyo jidka saxa ah ee loo Jeexay nidaamka ay Ilma-nebi Aadam ku maamulayaan dunidan.
Meeriskan oo ka mid ahaa ruwaayaddii Caan baxday ee Ragoow Aarsi Haween U Adkaysta markiine, ee uu curiyey Abwaankii qayuurka ahaa Alla ha u naxariistee Ibraahim Sheekh Saleebaan Oo [Ibraahim-gadhle] loo yaqaanay.
Talada iyo Maamulka hoggaamineed ee dunidan alle waxa uu si daah-furnaan ah inoogu tilmaamay in Masuuliyada la kala leeyahay, qof kastaana xad uu ku leeyahay xilka dunida ka saran [marka ay tahay labka iyo dhediga], sidaas oo ay tahay, Inan-rag waxa loo suntay Mas’uuliyadda guud ee bulshadiisa, laga soo bilaabo naftiisa, qoyskiisa, bulshadiisa iyo guud ahaanba inta ku xeeran ee xilku ka saran yahay.
Haddaba Ruwaayadda uu meeriskani ku jiray waxa ay gudbinaysay farriin ka turjumaysa sida qaldan ee raggu u fahmay masuuliyada ka saran bulshadiisa iyo qoyskiisa, oo u muuqday mid tacadi badan iyo god-daloolooyin ku astaysan, taasina ay markiid embe sababtay isbedel maamul oo lid ku ah kaas hore, dumarkiina ay halgan dheer oo ay u galeen iska dhicinta xad-gudubyada kaga imanaya hoggaankoodii ay ku hanteen xorriyad iyo isku filnaansho, taas ka dib waxa meesha soo gashay in bilis xaawalay ay ku tashadeen ka aarsadaan inan-rag.
Ujeedooyinkaas aynu ka warranay iyo cuqubooyin ay dambarkooda markii dembe raggu dhameen ayuu Meeriskani ku suntan yahay, waxaana inoo tirinaya Isla Abwaanka ruwaayadda Curiyey Ibraahim-gadhle ee dhugo oo dhuux:
“Dayax Dhacay Daleed Qaawanoo Dugul Madoobaatay
Gudcur Dama, Habeen Daaha Rogay, Daallaliyo Foore
Cirkoo Daruurtii Huwaday Fadadna Doonyaystay
Heegada daroortiyo Xareed Dooxa soconaysa
Dhankaan Dayaba daadkiyo biyaha dulun-dulcaynaaya
Anigoo Dabayl iyo qayood wada dadoonaaya
Allahayoow Geel dib-jiray Maxaan Keligay Doon-doonay
Maxaa dawri Aar iyo Libaax igu dinnaayeeyey
Dacaw igu dhawaaqiyo Shabeel daafta iga raacay
Dib u eegmadoodii maxaan dogob Galool Jiidhay
Maxaa lugaha diirkooda sare deebtu iga leeftay!!!!
*******
Diihaalka gaajada anoo diifta la ledi waayay
Dermadaan ku jiifsaday anoo duudka kala booday
Deeq lagama quustee maxaa dirirku ii hooray
Maxaan doobigaygii ku shubay dogob karuurkeeda
Dambarkii markaan dhamay maxaan kibir la daanshooday!!!!
Allahayoow dirxiiliyo maxaan belo ka soo doogay
Dunidaada Eeboow maxaan nabad ku soo daaqay
Allahayoow da’daan jiray maxaan daawasho u joogay
Arrinkii duraayiyo maxaa sheeko igu duuban!!!!
Anigoo dorraad soo ahaa beel nin daadihiya
Dabo malaha belaayee anoo daanka qabanayaayey
Deeqda iyo markay taagan tahay doodda iyo bane
Iyadoo rag ii daba socdoo iga dembeynaayay
Diyo iyo anoo qaar badnaa dayn u kala qaaday
Anigoo dadweynaha dhaqoo nabad u daaweeya
Derajada rag leeyahay anoo daafta sare gaadhay
Anigoon haween talo ka deyin dirasho mooyaane
Allahayoow doc naageed miyaad igu dembaysiisay
Doqon dheregtay may daalisoo maygu damalaysay
Gabalkii markuu dumay ilaa dalalacdii waaga
Anigoo derbiga yuururoo dibada meeraaya
Miyuu sheekhii ii daakiroo diigii igu heesay!!!
Anigoon Waqtiga diidanayn doorba waxa jooga
Anigoon damaaciyin nin kale dahabka uu haysto
Siduu done-yeelloow adaan talada kuu daayay!!!!
xigasho hubaal media