hargeisa(wajaalenews)Somaliland: waad Qurux Badan Tahay I Dheha
Muwaadiniinta Somaliland inta ugu badani may jeclaysanin ama waa bay ka xanaaqeen warbixintii uu Golaha Amaanka u gudbiyay Etgayga Khaaska ah Xoghayaha Guud ee Qaramada Midoobay u qaabilsan Somalia iyo Somaliland waayo waxay warbixintu xusaysay xaqiiqo ka jirta Somaliland laakiin dhegaheenu aanay jeclaysan. Xukuumaddu ka may hadal dabcan hadal na ugama furnayn ayaan odhan karaa anigu. Warbixintu waxay ka dayrisay dimuqraadiyaddii Somaliland oo beryahan ay soo food saareen haliso badan oo dhinca xukuumadda laga wado ama sida saxa ah madaxtooyada lafteeda laga dhex wado. Waxaynu ognahay warbixinta lafteedu na ay xustay cabudinta ay xukuumaddu ku hayso xoriyadda hadalka saxaafadda madaxa banaan oo dagaal toos ah ay kula jirto. Waxa kale oo warbmixintu ay xustay in madaxda mucaaridka mararka qaarkood loo diido socodka oo dhacday oo run. Guud ahaan warbixintu way ka dayrisay heerka hoose ee markii ugu horeysay dhinaca dimuqraadiyada ay Somaliland ka gaadhay.
Hadaba bulshada caalamku waxay xogogaal u tahay arimaha in badan oo muwaadiniin ihi ay had iyo goor ka hadasho lakiin Dhego Culus, waa xukuumadda Somsliland eh ay dhegaha ka daboolato iyadoo inta u nasteexa ah ee jecel wanaaga Sonaliland ku tilmaanta qaran dumis marka ay soo jeediyaan wada tashi ama ay si badheedh ah u tilmaamaan gol daloolooyinka dhinaca xukuumadda, iyadoo nuxurkoodu yahay keliya”WAAR WAX BAA INAGA QALDANE HA LA SAXO OO AYNU WADA SAXANO”.AHN eh abwaan gaariye ayaa maansadii ugu horeysay silsiladdii deelay ayaa wuxu yidhi:
NIN MURAAYAD DAAWADAY
FOOLXUMO IS DIIDSIIN
ISMA DOORIN KARAYEE
MA INUU DILAACAA
Hadaba hadii aynu Somaliland nahay waxaynu jecel nahay in indhaha bulshada caalamka la inoo arko wax wanaagsan oo qurux badan hadana xukuumaddani ama madaxtooyadeenu inoo ma ogola in aynu wanaag sanaano iyo in aynu qurux badano midna. Ma ogola in aynu wada tashano wixii dhexdeena ah na wadahadal iyo is qancin ku dhamaysano, wixii inaga qaldan wada saxano, danta guud ee qaranka na wada ilaashano meelna uga soo wada jeed sanno. Marka ay sidaa tahay waxa furan in la yidhaa Mudane Madaxwayne, waxad heshay kursi uun ee dalka maad helin taladiisa na keligaa ma lehid mana yeelan kartid ee waa lagula leeyahay mar kasta ba.
Ugu dambaystii waxan leeyahay Somaliland laba ha kala dayso. Aan xumaado eh waad wanaagsan tahay i dheha, ama aan fool xumaado eh waad qurux badan tahay i dheha. Wakiilka Xoghayaha Guud iyo bulshada caalamka midna kama qarsoona xaaladda Somaliland hadii ay ka dayriyeena way u qalantaa mid laga dayriyo ayaan qof ahaan anigu ba aaminsa nahay ee yaa igu haysta?
Hadii aynu Somaliland nahay xaalkeenu wuxu ka dhigan yahay adoon Ilaahay baryay oo yidh ” ILAAHOW GUURSAN MAAYO EH UBAD I SII”, wuu siin karaa ilaahay laakiin sunaha noloshu waa in uu guursado ubadna ilaahay waydiisto
wajaalenews
hargeisa office