Hargeysa(wajaalenews) Musharaxa Madaxweyne ee Xisbiga UCID Jamaal Cali Xuseen oo hore u cambaareeyey falkii isku dayga Dil ahaa ee lala beegsaday Maxamed Kaahin Axmed, ayaa dhinaca kale maanta ka hadlay xadhiga Oday Xaashi Muuse oo u xidhan falkaas, kaasoo uu ku tilmaamay Aar-goosi siyaasadeed isagoo u jeeda Mujaahid Muuse Biixi Cabdi iyo kooxdiisa oo la sheego inay sabab u ahaayeen xadhiga Odayga, maadaama Muuse War-saxaafadeed uu soo saaray ku sheegay Ragga Maxamed Kaahin weeraray in uu ka mid ahaa Xaashi Muuse.
Qoraal uu Jamaal Cali Xuseen ku baahiyey barta Facebook-ga ayuu arrintan kaga hadlay waxaanu qoraalkiisu u dhignaa sidan:-
Marka hore falkii ka dhacay magaaladda Hargeysa todobaadkii hore ee laysku dayey in lagu toogto Mujaahid Maxamed Kaahin Axmed waxaan mar kale ku celinayaa inaanu canbaareeynayno falkaasi, arrinkaasina wuxuu ahaa mid foolxumo ku ah waddankeena. Maxamed Kaahin iyo muwaadiniinta kale ee Somaliland u dhashayba ee ay dhacdadani soo fool saartay wuxuu falkaasi u ahaa mid ugub ku ah iyaga iyo Somalilandba oo u baahan in wax looga qabto si qoto dheer. Haddaba anigoo taabacsan in si deg-deg ah sharciga loo hore keeno ciddii ka danbeeysay falkii loo geystay mujaahid Maxamed Kaahin, haddana waxaan liqi kari waayey sababta loo xidhay nin aan waxba galabsan oo ah odoyga weyn ee Xaashi Muuse Xuseen oo hore u ahaan jiray Mayaarkii magaaladda Hargeisa, ahna oday weyn oo karaamo iyo sharaf ku leh dalka, imikana ka mid ah ragga ugu waaweeyn odoyaasha reer Hargeysa ee imika nool. Odoygaasi maalintii dhacdada Maxamed Kaahin wuxuu joogay hotelkii uu arrinku ka dhacay waana ninkii badbaadiyey Maxamed Kaahin ee yarkii qoriga kula cararaayey ka dhuftay intuu dhirbaaxay weliba. Maanta in bilad geesi la siiyo bay ahayde, ma in odoygii sifo sharci darro ah loo xidho isagoon waxba galbsan ayeey ahayd>
Shalayto ayaan ku booqday Xaashi Muuse saldhiga Booliiska ee Kood-buur oo uu ku xidhan yahay muddo 5 cisho ah. Waxaanan aad uga xumaadday ninkaasi weyn ee xaqdaradda u xidhan ee sifaha aargoosashadda siyaasadeed loo xidhay. Mar aan wax ka weydiiyey arrinkiisii wuxuu ii sheegay in habeenkii ugu horeeysay ee looga yeedhay saldhiga Booliiska ay isla markiiba Wasiirka Arrimaha Gudaha iyo Taliyaha Ciidanka Booliskuba ay xaal siiyeen oo uu gurigiisii ku noqday. Ka dibna laba habeen ka dib loo yeedhay oo la xidhay ilaa haddana aanu garaneeynin cidda xidhay, iyo sababta loo xidhay. Haddaba Xaashi Muuse yuu u xidhan yahay? Somaliland waxaad mooddaa in dadkii la kala qaybiyey. Waxaan dhowaan maqlaayey siyaasiyiin xisbiga tallada haya ka mid ah oo ku qudbadeeynaayey inay Halgan gelayaan oo dagaal sameeynayaan. Xaggee adduunka lagu arkay xisbi haya talladda dalka oo haddana dadkii u kala saaraya wax Siyaad Barre la soo shaqeeyay iyo wax SNM ah. Somaliland waatii la heshiiyey nin welibana Siyaad Barre wuu u soo shaqeeyay ee yaan dadka la kala qaybinin. Xaashi Muuse wuxuu ii sheegay inaanu ka baxaynin saldhiga Booliiska ilaa loo sharaxo sababto sharci darada ah ee uu intaasoo maalmood uu ugu xidhan yahay magaaladda Hargeysa arrin aanu garaneeynin. Dadka odoyaasha ah ee Birmageeydada ah ixtiraam ayeey inagu leeyahiin haddii wax lagu haystana waa in loo sharaxo oo sharciga si deg-deg ah loo mariyaa. Laakiin arrinka Xaashi Muuse wuxuu u muuqdaa aargoosi siyaasadeed iyo bahdilaad ay xukuumadda tallada haysa iyo xisbigeedu ay qayb bulshadda ka mid ah ay ku beegsanayaan. Waxaanu ku baaqaynaa in cidkasta sharciga la horkeeno oo aan dadka loo xidhin aargoosi. siyaasadeed iyo wixii la mid ah
wajaalenews.comwajalenews@gmail.com