Waa maanso aan kaga hadlayo xaaladaha qallafsan ee maanta bulshadeenu la daalaa-dhacayso.

Murtiyo tabaheeda

Maraaro-dhiggeeda

Anoo maxamud bal

Markeba u cidaadin

Ayuu millil dhiigay

I maax godliyaaye

Waxaa I mudaaya

Sidii mudac fiiqan

Maqaarka dhilaaya

Halkaynu marayno

Moraal xumadeeda

Mugdiga arrinkeena

Murgidda xadhkihiisa

Hadday madaxdiiba

Masiir ummadeedka

Majare u daygiisa

cabdow ka masuugto

Madhuufe dadkaasi

Mankooduna shiiqye

Markayse darnaato

Miskaha lagu ciiro

Waxaa leh miskiine

Maraaxilka taagan

Maroorka dhaqaale

Murdiso leefleefka

Manuus uugaanka

Cidday micidiisu

Miriirsiyaysaaba

Maxaysato weeyi

Markii la mildhaaway

cid maamusha wayday

Maciishadda heedhe

Cirkaa lagu meershay

Waxay murgugaaftay

Malaayin dan lay ah

Mujooyinka ooyay

Mirtii dhexe qaaqle

Maxaa lagu kaalin

Maxasta goolmooni

Madhnaanta caloosha

Wataa meehanawga

La wada murugootay

Midhbaanse tebaaye

Ninkay maaraynta

Mushkilo xallinteedu

Miciin ka sugaysay

Miyuu horta dhaaday?

Miniin ka miniinba

Ilaa mi’atayn gu’

Abaar inna miiqda

Harraad miyi eedo

Magaalana jiidha

Maseeya dalkoo dhan

Ma wayno dadoowe

Miyaan la gudbaynba

Masiibada weeran

Mataano is-eegta

Midkood ka kaleeto

Maqnaansho u diido

Miyaan la ahaanay?

Biyaha mulacleeya

Majiiraha daadka

Mahwiga dananaaya

Moos aan ku dabbaalno

Madhxin iyo kaydso

Miyaan tahli waynay?

Maadh aad dhididaabu

Muruqu keenaaye

Meerarkiyo beerta

Miigaynta qodaalka

Maxaa lagu daayay?

toloow maankeenna

Maxaa ku dahaadhan?

Malkada caafimaadna

Muhiimadda weeyi

Bulshada milgaheeda

U muunad horaysa

Mashaqo halisaaba

Mandhawse ka taagan

Dawooyin mulaaqa

Malleel iyo huube

La soo maydhaamay

Suntaa midabaysan

Dadkii madiyaysay

Mariidka qofkii ah

Kiniino la miisay

Sidii milix iib ah

Markii la magaabshay

Moxogga iyo beerka

Miyay ka wareentay

Madluunka xanuunka

Meeraysi waliilka

Mihnad dhakhtareeda

Magaan ku shaqaysta

Midh aanse taraynin

Muxuu u dan sheegtay

Manaxe cadawgiina

Marada faraqeeda

Maaleey uga buuxi

Maalkiina ka reebay

Midigtu naafawday

Macaash dhagaraysan

Muxuu la carraabay

Miroow bukihiina

Muquur sakaraadda

Muxuu la abaaday

Maydkiisa la jiiday

Mid wayga su’aale

Yaa maaruqiddaasi

Masuul ka ahaaday ?

Mishiino shidaalka

Mucdiisa dayaaya

Haddii la milkeeday

Dawada milaygeeda

Tayada midhaheeda

Minaahidin eegga

Maxaa lagu dhaafay

Hadmuuse matoorku

Muwaadin jibaaday

Mudnaanta ka yeeshay?

Markaad cuganayso

Bulshooy masanuunta

Miqyaaska janjeedha

Miisaan li’idaadu

Wataa ku malgaysa

Mid reer hebel sheegta

Maqiiq u difaaca

Maxaafsade tuuga

Maamuus ku cayuuqa

Miyaanad ka daalin?

Maxaadse ka dheeftay?

Bulshooy mudutuusha

Maqaar geed saaran

Maqluub duugoobay

Muraajacadiisu

Miyaanay dhamaanin ?

Mallooliga qoodha

Haddaanad ka miirin

Maan-laawaha doobya

Maxaadh u dabaysan

Maddaale ku tiirsha

Maqaam sare gaynin

Maxsuul lagu reeyo

Wallee ma mahiibtid

Maseexdaha jiidda

Marlayda diciiftay

Haween milicdaasi

Milgooy u jarmaada

Masruufka agoonta

Nin maala tunkiisa

Midiidin saboola

Macallin iyo kuuli

Mullaaxda xaqooda

Maxaa laga haagay

Mirqaan lagu oogay

Nin moog sifaheedu

Minaarad ka jeexday

Meeriskaba fiidka

Mayrac galabeedda

Markuu hoyanaayo

Marbaa la tirshaaye

Bulshooy maqalkaaga

Furaha moodkaaga

Ninkaad ku marriintay

Mar uun ka xisaabi

Wixii maqan raadi

Miyaad garan wayday?

Siddiiq miyir beelka

Mudaan ku dagnaaye

In aan miiraabo

Miyaan la filaynba?

Maalkaaga nin raacay

Madaa la tusaaye

hadaad uga maagtay

Muddayniyo xeerba

Moofeeyaha baasi

Siduu maalaayo

Muquuno la siiyay

Miskeeday hashaada

Adoo macaluulay

Mudh iyo andariira

Muraara-dillaacsan

Ninkii ku midhsiibay

Madhiyay haantaadu

Hadduu muusoodo

Maaweelo ku heeso

Muxubbo heelloodka

Mashxarad la kacaaga

Waxaan ku masaalo

Maskaxdu garanwayday

Siyaasi muraadle

Markay danihiisu

Mus ay ka galaanba

Intuu ku majeerto

Meexaano qabiilka

ku meersho xiskaaga

Ayaad muldhataayo

Sidii mas dilaaya

Martabad saarkiisa

Macsuun u dhiggiisa

U soo muhataaye

Car maalin qudhaata

Manfaaciga laalan

Magoolka hagaasay

Maatida oon laayay

Sixada miinawday

Maryaad bayhoofka

Intaad is-maleegto

Mayeelayo taa dhe

Miidaanu taxriirka

Mar uun bal istaaga

Car maalin qudhaata

Waxaa musuqmaasuq

Mareegaha goostay

Mallaalka gadaaya

Rugtiyo minankaaga

Intaad u midawdo

Ma yeelayo taa dhe

Miidaanu taxriirka

Mar uun bal istaaga

Car maalin qudhaata

Intaad mudh u toosto

Cadliga marinkiisa

Madawgu hadheeyay

Shuruuc miis taalla

Muraad qumiskeeda

Mashruuc lagu qaato

Malluug beeneedda

Ma yeelayo taa dhe

Miidaanu taxriirka

Mar uun bal istaaga

Car maalin qudhaata

Mudanka dhashaada

Miiddii hilbahooda

Intuu murmureeyay

Maggafe bidhanaayo

Waxaa inan miiggan

Midhaafay badwaynta

Mustaqbal li’idooda

Mayeelayo taa dheh

Miidaanu taxriirka

Mar uun bal istaaga

…………………………………………………

Cabdirisaaq Maxamed Muse