XALKA: SAMI-QAYBSIGA GOLAHA WAKIILADA JSL.

Markasta oo doorashadii Golaha Wakiilada soo dhawato, waxaa bilaabma buuq iyo is-qabqabsiga sami qabsiga Golaha Wakiilada. Doorashada Golaha Wakiilada ee 2005 inta aan la qabanin, ayaa gobalada qaarkood ka biyo diideen samiga Golaha Wakiilada loo qoon deeyay. Haddaba, waxaa ay  Maxkamda Sare soo sartay go’aan xal u ahaa sami qabsiga. Go’aankani waxaa uu odhanayay :

Samiga Golaha Wakiilada (ka ay manta gobaladu ku fadhiyan) waa in doorashadani lagu galo. Doorashooyinka danbana waa in dalka laga hirgaliyo diiwan galin lagu saleeyo sami qabsiga Golaha Wakiilada.

Go’aanka Maxkamada sare waxaa laga jooga 10 sano, Xukumadani iyo tii ka horaysaba waa ka masuula in dalka diiwan galin laga qaban. Golaha Wakiiladu waxaa ay ahayd in ay Xukuumada ku daba galan sidii dalka laga hirgalin lahaa tira koob. Sida daraadeed, Xukumada iyo Golaha Wakiiladuba way ku fashilmeen arintani. Haddaba, iyada oo  mudo koobani ka hadhay wakhtigii la soo dooranayay Golaha Wakiilada , waa  nasiib daro in xubno ka mid ah Golaha Wakiiladu in ay ku andacoodan in aanu gobalkoodu helin samiga ay xaqa u leeyihiin.

Maanta mar labaad ayay dadk Somaliland doorashadii Golaha Wakiilada u diyaar yihiin. Haddaba, cida xil gudasho la’aanta ku doonaysa  in loogu hibooyo in ay Korasta Golaha Wakiilada iskaga sii fadhiyaan, waa dad liita oon isla yaabaynin.

Somaliland waxaa qabsatay 5 doorasho, marka laga biloobo 2002 oo dhacday Doorashada Golaha Deganka ilaa iyo 2012 ooy mar labad dhacday doorashadii Golaha Deganka. Doorashooyinkani waxaa ka soo baxay Natijooyinka tirade codaysay. Waa dhab in doorashooyinka dadka qaar ay codeeyan mar wax ka badan. Lakiin waxaan qaba in gobalada oo dhan ay ka sinaayeen arintaasi. Teeda kalana, natiijooyinkaasi waxaa lagu doortay, xildhibaalo golaha degaan, gole Wakiilada iyo Madaxwayne iyo Madaxwayne ku xigeeno, sida daraadeed lama odhan karo waxba laguma qaybsan karo.

Haddaba, qoralkani waxaan doonaya in aan dib u eegid ku sameeyo natiijooyinkii tirada codadka doorashooyinka ee dalka ka dhacay iyo waxa uu xalku yahay. Waxaan xisaabiyay tirade codadka Median-ka gobalkasta. Median-ku waa tirada dhex dhexaadka ah. Waxaa gobalkasta ka tuuray tirada codadka ugu badan iyo tirada codadka ugu yare, kadibna waxaan soo saraya tirada codadka isku celceliska ah. Tirada codadka ee aadka u badan waxaa tusaale u tahay in tirada codadkaasi ay ka fogtahay tirada gobalka ka codaysay, ooy ku jiraan codad dheerada. Isla markana, tirada codka ee yari waxaa calamad u tahay in wax ka qaldan yihiin sida loo codeeyay. Marka tirada codadka e saxi ahi waa ta dhexda ah, tani oo ka turjimaysa tira ka codaysay gobalka.

Degmada Buuhodle ee gobalada Togdheer doorasho kama dhicin, marka Natiijada codadka gobalka Togdheer ma aha kuwa ka turjimaya tirad codadka ee gobalka. Tirada codadka ee deganka Buuhoodle waxaan lagu qiyaasi karaa  in ay tahay 10% ilaa 20% codadka gobalka Togdheer. Sida daradeed, waxaan xisaabta ugu darnay 20% codadka gobalka Togdheer. Tirada aanu ugu darnay ma ah mid sax ah, lakiin waa ‘estimation’ ama qiyaas qaadasho.

Sida oo kale, bariga Sanag lagama codayn. Tirada degmooyinkani waxaan lagu qiyaasi karaa in ay tahay 20% ilaa 25% codadka gobalka Sanag. Tirada aanu ugu darnay ma ah mid sax ah, lakiin waa ‘estimation’ ama qiyaas qaadasho.

Gobalka Sool, degmada Caynaba oo kaliya ayaa laga codeeyaa,  gobalka intiisa badana lagama codeeyo, marka laga reebo doorashadii deganka ee 2012, oo degmooyinka sida Las-caanod si fiican uga dhacday. Codadka gobalka Sool ka maqan waxaa lagu qiyaasi karaa in 80% ilaa 90% tirada codadka ka codeeyay. Sida daradeed waxaan xisaabta ugu darnay 90% codadka gobalka Sool, in ay ka maqan yihiin. Marka laga reebo doorashada deganka ee 2012, oo la odhan karo 50% gobalka waa  laga codeeyay. Tirada ma ah mid sax ah, lakiin waa ‘estimation’ ama qiyaas qaadasho.

 

Natiijada dadka dalka ka codeeyay & Samiga Golaha Wakiilada by Median-ka.

Gobalo	G/Deganka  2002	Madaxtooyada 2003	G/Wakiilada Sept 9, 2005	Madaxtada 2010	G/Deganka 2012	Median	Samiga By Medianka
Saxil	30,807	30,537	52,479	29,211	54,533	37,941	5
Awdal	100,495	65,930	133,020	81,338	114,452	98,762	14
M/Jeex	186,383	208,864	253,229	236,651	314,663	232,915	33
Togdheer	66,598	115,064	121,751	111,653	160,460	116,156	17
Sanag	53,096	57,938	89,286	58,515	114,642	68,580	10
Sool	6,266	9,702	20,557	20,878	49,383	20,718	3
Total						554,354	82

Codka Kursiga Golaha Wakiilada: 554,354/82 = 6,760 cod.

 

Natiijada dadka codeeyay + lagu daray tirada codadka Estimationka  & Samiga Golaha Wakiilada by Median-ka

Gobalo	G/Deganka 2002	Madaxtooyada 2003	G/Wakiilada Sept 9, 2005	Madaxtooyada 2010	G/Deganka 2012	Median	Samiga
Saxil	30,807	30,537	52,479	29,211	54,533	37,941	5
Awdal	100,495	65,930	133,020	81,338	114,452	98,762	13
M/Jeex	186,383	208,864	253,229	236,651	314,663	232,915	31
Togdheer* + 20% = (codka estimationka)	79,918	138,076	146,101	113,984	192,552	132,720	17
Sanag*+ 25% = (codka estimation)	66,370	72,420	111,608	73,144	143,303	85,724	11
Sool * + 90% = (codka Estimation)	11,905	18,434	39,058	39,668	74,075’*	39,363	5
Total(codka Estimation						588,062	82

Codka Kursiga Golaha Wakiilada: 588,062/82 = 7,171 cod ama 7,600 cod.

‘* Doorashada G/Deganka ee 2012, degmada Las canood waa laga codeeyay, waxaan ugu darnay 50% tira ka codaysay in ay wali gobalka ka baqantahay.

 

Natiijada dadka codeeyay doorashada G/Deganka 2012 & Samiga Golaha Wakiilada By

Gobalo	G/Deganka 2012 Dadka codeeyay	Median Dadka Codeeyay	G/Deganka 2012 + Estimate	Median Dadka +Estimate	Samiga G/Wakiilada ku-fadhiyan
Saxil	54,533	5.6	54,533	5	10
Awdal	114,452	11.7	114,452	10.5	13
M/Jeex	314,663	32	314,663	29	20
Togdheer* + 20% = (codka estimationka)	160,460	16	192,552	17.7	15
Sanag*+ 25% = (codka estimation)	114,642	11	143,303	13	12
Sool * + 90% = (codka Estimation)	49,383	5	74,075’*	6.8	12
Total(codka Estimation	808,133	82	893,578	82	82

Kursiga Golaha Wakiilada dadka codeeyay: 808,133/82 = 9,855 cod.

 Kursiga Golaha Wakiilada dadka codeeyay + Estimate: 893,578/82 = 10,897

Haddaba, marka la eego natiijooyinka dadka codeeya 5-ta doorasho iyo xisaabta aan kor ku xusan. Marka dadka Somaliland ayay u tala in qiimayaan gobalka samigi kurasta G/Wakiilada ka maqan yihiin iyo ka ay ku maqan yihiin.

Haddaba, xalku muxuu yahay? Xalku waa in:

• Samiga Golaha Wakiilda ee gobalada helayaan in lagu qiimayo Natijada tirada codadka ee doorashooyinka dalka ka dhacay, iyada oo la isla qadanayo samiga ama ‘percentage-ka’ loo qoondeeyo degmada Buuhodle ee gobalka Togdheer; Sanag bari iyo gobalka Sool, marka laga reebo degmada Caynaba iyo deganada kale ee laga codeeyay.
• Mar haddii dadka codaynaya doorashadani la diiwan galiyay, oo natiijada doorashadani ay noqonayso (Haddii Eebo Yidhaa), ‘One-Man-One Vote’ ama Hal-qof iyo Hal cod.  Marka waa in mudanayasha ugu codka badan ee dalka oo dhan ay ku soo baxaan ‘ONE-MAN-ONE VOTE’.  Sida daradeed, la iska dhafo samiyada loo qaybinayo  Marka laga reebo degmooyinka aan laga codayn, degmooyinkasi oo loo qoondoonayo sami iyo hab lagu soo xulayo. Dalka intiisa kale mudanayaasha ugu codka badan ay ku soo baxaan Golaha Wakiilada.
• Mar haddii mudada doorashada ka hadhay in ka badan hal sanad iyo badh, isla markana dadka 15 jirka ka wayni haystan warqadii aqoonsiga, waa in la diiwangaliyo dadka da’doodu ka yartahay 15 jirka. Kadibna, diiwan galintani gobalkasta/degmokasta lagu qaybiyo kurasta ay ka helayaan G/Wakiilada.
• Haddii qodabada aan kor ku xusay aan la isla qadan karin, marka cida ay wax ka maqan yihiin waa in iska samirto, oo samiga gabalada lagu qaybsado sidii hore loogu qaybsaday. Lakiin, cida leh waxbaa iga maqani waa in ay ka fiirsato cida ay dooranayaan doorashadani, khasatan cida ay u dooranyaa Madaxwayne. Shakhsiga ay Madaxwayne u dooranyaan waa inuu noqdaan qof ogal in diiwan galin lagu qaybsado samiga Golaha Wakiilada. Isla markana u balanqada gobaladaasi inuu bisha ugu horaysa ee uu maamulka la wareego uu dalka ka bilaabayo diiwan galinta dadwaynaha (Haddii Eebo Yidhaa).

 

Somaliland ha noolato!!!!!!!!!!!!!!!

Omar A. Yousuf

Oakland, Californai