Ceerigaabo(Wajaalenews) Weftiga komishanka doorashooyinka qaranka Somaliland hoggaaminayeen oo saaka si weyn loogu soo dhoweeyey magaalada Hadaaftimo ayaa waxayduhurnimadii manta hore u gaadheen Magaalada Badhan ee Sanaag-bari.

Weftiga ayaa halkaas oo ay maanta qadada ku lahaayeen si weyn loogu soo dhoweeyey waxayna kulanno la qaateen madax-dhaqameedka iyo waxgaradka kale ee degaannadaas ku dhaqan kuwaasoo iyaga iyo weftigu ka wada hadleen hawsha weftigu u socdo ee ah xog ogaal u noqoshada degaannadaas iyo in diiwaangelintu ka suurtagelayso.

Dhinaca madax-dhaqameedka iyo waxgaradka kale ee bulshada degaankaas ayaa sida la sheegay iyaguna dhinocooda weftiga u caddeeyey in bulshada degaannadaas Sanaag-bari guud ahaan diyaar u tahay sidii ay wax ula qaybsan lahayd bulshada kale ee Reer Somaliland soona dhowaynayso diiwaangelinta xilliga dhow laga samaynayo Somaliland.

Sikastaba ha ahaatee tallaabadan ayaa u muuqata horumar dhinaca siyaasadda iyo is fahamka oo bulshada Sanaag-bari dhinocooda laga dareemayo waxana la filayaa taasi inay sababto horumarro waaweyn oo dhinacyada arrimaha bulshada ah oo degaannadaas ka hirgala.