HARGAYSA(W,N)-Musharraxa Madaxweynaha Xisbiga WADDANI mudane Cabdiraxmaan Maxamed Cabdillaahi Cirro, musharraxa madaxweyne kuxigeen Ambassador Maxamed Cali Aw Cabdi, Guddoomiyaha xisbiga mudane Xirsi Cali X Xasan oo ay weheliyaan masuuliyiin kale ayaa kulan la qaatay qaybo ka mid ah aqoonyahanka iyo ardayda jaamacadaha caasimadda Hargeysa.

Kulankan oo si buuxda labada dhinac isugu xogwaraysteen waxa diiradda lagu saaray qorshaha xisbiga ee dhinacyada siyaasadda iyo horumarinta baahiyaha aasaasiga ee bulshada waxaana arrimahaasi si mug leh uga xog warramay madaxda xisbiga.

Hoggaanka xisbiga ayaa aqoonyahanka ku bogaadiyay kaalinta ay kaga jiraan isbedel hoggaamineed oo dalka ka dhaca waxaanay ku boorriyeen in ay sii xoojiyaan sidii bulshada loo wada gaadhsiin lahaa in dalka laga badbaadiyo talo xumada ku habsatay.

Prof Siciid Sheekeeye oo kulankan qabsoomiddiisa ka shaqeeyay ayaa tilmaamay in ay muhiim tahay in aqoonyahanka iyo waxgaradku qayb libaax ka qaataan isbedelka hoggaanka dalka.

Dhallinyarada aqoonyahanka ah ayaa dhankooda ballanqaaday in ay si mug leh uga qayb galayaan halganka isbedel doon ee xisbiga WADDANI hoggaaminayo.