Addis Ababa (W,N)- Shirkadda Ethiopian Airlines, ayaa wax ka beddel ku samaysay marinka Duullimaadyadyada diyaaradaha isticmaala Hawada Soomaalida sababo la xidhiidha muranka u dhexeeya Somaliland iyo Soomaaliya.

Ethiopian Airlines waxa ay joojisay isticmaalka 14 marin-duullimaad (Flight Routes) oo isticmaala hawada Soomaalida, kaddib markii duuliyeyaasha qaarkood caqabado kala kulmeen taawarrada diyaaradaha laga hago ee fadhigoodu yahay Magaalada Muqdisho, kuwaas oo bixiyey amarro is-khilaafsan oo khalkhal geliyey bad-qabka duullimaadka.

Duullimaadyada Ethiopian Airlines ee wax-ka-beddelka lagu sameeyey oo badankoodu isticmaali jiray Hawada Somaliland, ayaa loo wareejiyey dhinaca Hawada dalka Jamhuuriyadda Jabuuti ka hor inta aanay ku safrin biyaha Caalamiga ah ee Gacanka Cadmeed.

Qoraal ku taariikheysan 28-kii February, 2024 oo Shirkadda Ethiopian Airlines ku socodsiisay Ururka ay ku midaysan yihiin Diyaaraha Rayidka Caalamka ee IATA, ayey shirkaddu ku wargelisay wax-ka-beddelka ay ku samaysay marin-duulimaadka ay hore ugu safri jirtay Hawada Soomaalida iyo khidbaddii laga qaadi jiray duulimaad kasta oo dhan $395.

Qoraalka Ethiopian Airlines ku socodsiisay IATA, waxa ay ku tidhi, “Waxaan idinku wargelinayna is-beddel aanu ku samaynay jadwalka duulimaadyada Ethiopia Airlines, anagoo joojinay isticmaalka hawada Soomaalda, ka dib markii duuliyayaashayadu ay kala kulmeen hawada Soomaaliya xogo is khilaafsan iyo carqalado joogto ah, sida darteed anagoo ka duulayna fayo-dhawrka iyo ammaanka rakaabkayaga rayidka ah ee aanu wadno, waxaanu go’aansanay inaanu Hawada Soomaalida ka leexinno 14-ka duullimaad ee halkan ku xusan.”

Duullimaadyada loo wareejiyey dhinaca Hawada Jabuuti, ayaa ku kooban Duullimaadyada Ethiopian Airlines ugu kala gooshto Magaalada Addis Ababa iyo magaalooyinka Dubia, Mumbai, Delhi, Chengdu, Beijing, Guangzhou, Shanghai, Seoul iyo Muscat.

Isbeddelka ayaa intooda badani ku kooban yahay duullimaadyada ka tagaya Magaalada Addis Ababa ee u socda magaalooyinkaas.

Sida Aanu ka ogaannay xogta duullimaadyada ee Ethiopian Airline, isbeddelka shirkaddu samaysay oo dhaqan-galay 25-kii February, ayaan wax samayn ah ku lahayn duullimaadyada Ethiopian Airlines ee ka imanayaa magaalooyinka kor ku xusan oo badankoodu isticmaala Hawada Somaliland.

Tallaabada Ethiopian Airlines qaadday ayaa ka dambaysay kaddib markii Hay’adda Duulista iyo Madaaradda Somaliland ay Caalamka la wadaageen Xogta Dhacdo shil-diyaaradeed sababi gaadhay, kaddib diyaarad Ethiopia Airlines oo ku safraysay Hawada Somaliland ay farriin khalkhal gelin ah ka heshay Magaalada Muqdisho, iyadoo farriintaasi sababi gaadhay inay isku dhacaan diyaarad ay leedahay shirkadda Qatar Airways oo ku beegnayd marinka ay ku safraysay Ethiopian Arlines.

Diyaaradda Qatar Airways oo ku safraysay Joog Dhan 38,000ft, ayaa  lagu amray inay sare u kacdo 40,000ft taas oo sababi gaadhay inay isku dhacaan diyaaradda Ethiopian Airlines oo joog ahaan ka sarreysay kuna socotay 39,000ft, balse ku duulayay marin-duulimaad isku mid ah.

Diyaaradda Qatar Airways oo ka timi Doha kuna sii jeedday Entebbe iyo Ethiopian Airlines oo ka tagtay Addis Ababa kuna sii jeedday Dubai, ayaa isku weydaartay meel u dhow xeebaha magaalada Meydh ee gobolka Sanaag, kaddib markii duuliyeyaasha labada diyaaradood oo Kaashanaya qalabka ka-hortagga Isku-dhaca diyaaradaha ay si toos ah u xidhiidheen, taasoo baajisay isku dhaca labada diyaaradood.