MUQDISHO(W,N)- Qarax Xoogan ismarkaana jugtiisa laga Maqlayay xaafado badan oo ka tirsan magaalada Muqdisho Ayaa caawa ka dhacay agagaarka Isgoyska KM-4 gaar ahaan Wadada aada garoonka Aadan Cadde nawaaxiga Hotal Afrik.

Qaraxan ayaa la sheegay inuu ahaa nooca dhulka lagu aaso ee Miinada la dhigo hareeraha wadada, waxaana lala beegsaday gaadhi nooca aanay xabadu karin oo uu saarna sarkaal ka tirsanaa Booliiska Soomaaliya oo lagu magacaabo Maxamed Daahir.

Sarkaalka qaraxa lala beegsaday ayaa ka badbaaday weerarka waxana la sheegay inuu ku dhaawacmay qaraxa miino mid ka mid ahaa ilaaladiisa.

Ciidamo ka tirsan Booliiska Soomaaliya ayaa gaadhay goobta qaruxu uu ka dhacay waxayna baadhitaano ka bilaabeen goobta inkastoo aysan jirin ilaa hadda cid loo soo qabtay qaraxaasi.