Addis Ababa (WJN)- Ha’yadda caalamiga ah ee Amnesty International ayaa cambaareysay howlgal kumannaan qof lagu xidhay magaalada Addis Ababa ee dalka Itoobiya.

Amnesty waxay sheegtay in xidhitaanka dadka shacabka ah ay halis ku tahay horumarada haatan laga gaadhay ilaalinta xuquuqul insaanka dalkaasi oo uu gadhwadenka ka yahay ra’iisul wasaare Abiy Axmed.

Mas’uuliyiinta dalka Itoobiya waxay sheegeen in booliska ay xabsiga dhigeen dad badan kaddib marki dhawaan Addis Ababa ay ka dhaceen rabshado u dhexeeyay qowmiyadaha Oromada iyo Amxaarada, tiro dad ah ayaa ku dhintay qalalaasaha ka dhacay degmada Buraya.

Wakaaladda wararka ee AFP oo soo xigatay illo wareedyo ayaa ku warrantay in 65 qof ay ku dhintay rabshadiihii dhawaan ka dhacay deeganno ku yaalla magaalada Addis Ababa.

Warbaahinta Fana ayaa ku warrantay in 3,200 qof la xidhay.

Madaxa booliska ee Addis Ababa, Degfie Bedi ayaa sheegay in dad gaadhaya 1,200 qof oo lala xidhiidhinayo rabshadaha la xidhay islamarkaasna 107 qof dacwad laga gudbiyay.

Warbaahinta Fana ayaa sidoo kale sheegtay in 2,000 qof oo kale laga qabtay goobo lagu caweeyo oo ay kamid yihiin meelo lagu cabbo shiishadda iyo goobo lagu cuno jaadka.