Hargaysa (WJN)- Xukuumadda Federaalka ee Soomaaliya ayaa qiratay in ay sax tahay warqad deeqbixiyeyaasha kaga codsanayeen in aan dib loo cusboonaysiin macaamilka gaarka ah ee beesha caalamku siiso Somaliland, sida ku xusan heshiiska “new deal”.

Warqadda oo ka soo baxday xafiiska wasiirka qorshaynta ee Soomaaliya, 9kii June, ayaa lagu sheegay in heshiisku uu muhiim yahay, tan iyo 2013-na la gaadhay guulo wax ku ool ah, balse weli ay jiraan tiro caqabado ah.

Kaalmada oo si is le’eg loo qaybsado

Caqabadaha ayaa la sheegay in ay ku jiraan sidii xukuumadda federaalka iyo dawlad goboleedyada xubnaha ka ah federaalka ay u wada dhisi lahaayeen qaab lagu wada shaqeeyo oo waxtar leh, una ogolaanaya dawlad goboleedyada inay yeeshaan awood wax soo saar iyo mid ay adeegyo ku fidiyaan, si uu u adkaado iskaashiga kala dhaxeeya dawladda, halkii uu ka wiiqmi lahaa.

“Waxaan rumaysannahay in taageerada dhanka horumarka, ee aan loo eegayn dawlad goboleedkee baa taageero helaya, loo qaybiyo si haboon oo daahfuran, lana xaqiijiyo in dadweynaha oo dhan ay ka faa’iidaan, kaalmadana loo adeegsado horumarin, ee aan arrimo kale loo adeegsan” ayaa lagu yidhi qoraalka ka soo baxay xafiiska wasiirka Soomaaliya.

Kala qoqobnaansho dheeraad ah

Sida qoraalka lagu xusay, xukuumadda Federaalka waxay ka walaacsan tahay in hal dawlad goboleed ama gobol oo loo asteeyo macaamil gaar ah ay saamayn aad u daran ku yeelanayso dadaallada dhidibbada loogu aasayo nidaamka federaalka, iyo qaran-dhiska Soomaaliya.

“Dawlad goboleedyada kale ee federaalka waxay si furan u muujiyeen in haddii ay sii socoto la macaamilidda gaarka ah ee Somaliland, in iyaguna ay xidhiidh noocaas ah ka raadsan doonaan deeq-bixiyeyaasha, taasoo saamayn kala jajabnaan ah ku yeelan karta isku xidhka deeqaha Soomaaliya, wiiqina karta jiritaanka federaalka, siina murjin karta isu dheellitir la’aanta dhaqaale” ayaa lagu yidhi qoraalka.

Madaxbanaanida dalka

Dawladda Federaalka ee Soomaaliya waxay qoraalka ku sheegtay in ay soo dhoweynayso talooyinka aan “gorgortanka ka galayn madaxbanaanida dalka”, isla marakaana aan “si kas ah u galinayn maqaam faa’iido la’aan ah mid ka mid ah dawlad goboleedyadooda”.

Laanta afkasoomaliga ee BBC-da ayaa waxa ay la xidhiidhay wasaaradda qorshaynta ee Soomaaliya si ay macluumaad intaa dhaafsiisan uga hesho, laakin mas’uuliyiintii ay la xidhiidhay way ka gaabsadeen in ay faahafaahin siiyaan, waxayse ay u xaqiijiyeen in warqaddu ay tahay mid sax ah oo ka soo baxday xafiiska wasiirka.

Halkan ka akhriso warqadda oo ku qoran af-Ingiriis