Muqdisho,(W,N) – Diyaarad milateri oo laga leeyahay Turkiga ayaa garoonka diyaaradaha ee magaalada Muqdisho ka qaaday qaar ka mid ah dadkii ku dhaawacmay Qaraxii Muqdisho kuwaa oo cisbitaalada muqdisho waxba looga qaban waayay xaaladooda caafimaad.

Dadka oo gadiidka gurmadka deg deg ah looga qaaday cisbitaallada Muqdisho ayaa waxaa garoonka muqdisho ku sii sagootiyay mas’uuliyiin ka tirsan dowladda Soomaaliya.

Dhab ahaan lama oga tirada rasmiga ah ee dhaawacyada la qaaday, balse waxaa la filayaa in ay gaadhayaan ku dhawaad 40 ruux.

Sidoo kale waxaa lagu wadaa in dhaawacyo kale la qaado, iyadoo gurmadka uu yahay mid aan kala go’ laheyn.

Wasiirka caafimaadka Turkiga oo ay wehliyaan Dhakhaatiir iyo kalkaaliyeyaal caafimaad ayaa saaka soo gaadhay magaalada Muqdisho, si ay u caawiyaan dadka ku dhaawacmay qaraxa.