Hargeysa(W,N)-Wararka naga soo gaadhaya magaalada Burco ee xarunta gobolka Togdheer ayaa waxay sheegayaan in goordhawayd maxkamadda gobolka Togdheer ay go;aan kasoo saartay masuuliyiin xisbiga WADDANI ka tirsanaa oo ciidamada Booliska gobolka Togdheer xabsiga u taxaabeen.

Masuuliyiintan oo ay ciidamadu meelo kala duwan kasoo qabteen ayaa waxa amarka xadhiga bixiyey sida la sheegay badhasaabka gobolka Togdheer Maxamuud Cali Saleebaan “Ramaax”,iyaga oo muddo 3 cisho ah ku xidhnaa magaalada Burco.

Maxkamadda gobolka Togdheer ayaa amartay in xorriyadooda loo soo celiyo masuuliyiintaasi xidh-xidhan ee xisbiga WADDANI ka tirsan,waxaana ay shaaca ka qaaday inaan maxkamadda la keenin cadaymo ku filan oo la taxaluqa eedaymaha loo soo jeediyey.

Arrinkan sii daynta masuuliyiintan  ayaa waxa guntiga u xidhay xildhibaan Siciid Cilmi Rooble oo kamid ah saraakiisha xisbiga WADDANI,waxaana masuuliyiintan laga soo kala qabtay magaalada Burco iyo degmada Xaaji Saalax.