Hargeysa(wajaalenews)Taliyaha booliska gobolka Daadmadheedh Maxamed Cali Cabdi ayaa ka hadlay diyaarado duqeeyey isla markaana isla markaana rasaas ku ridey degaanka Balli Reer Cilmi oo hoos yimaada Oodwayne,waxaanu sheegay in ilaa hadda cid ku dhimatay ama wax ku noqotay aanay jirin balse ay xaqiiqo tahay oo rasaastii hubka ay gacanta ku hayaan.

Taliyaha booliska Daadmadheedh Maxamed Cali Cabdi iyo taliye ku xigeenka Cabdilaahi Diirye Cuduur oo wargeyska Geeska Africa khadka telefoonka uga waramay iyagoo ku sugan deegaanka ay diyaaraduhu rasaaseeyeen ayaa waxay sheegeen in ilaa hadda ay baadhitaano wadaan oo aanay hayn war rasmi ah oo ku saabsan diyaaradahan iyo halka ay ka yimaadeen,waxaana taliyaha oo aanu ugu horeyn waydiinay diyaaradahan ayaa waxa uu yidhi

“Hadda lafteeda ayaanu meesha maraynaa oo baadhitaankii ayaa socda ,diyaaraduhuna waa dhab balse cidna waxba may yeelin oo meel bay rasaas ku rideen,meeesha ay rasaasta ku rideena waxaanu kazoo gurney khasharo yar yar oo aan ahayn qoryaha waa wayn,deegaanka ay diyaaraduhu rasaasta ku rideen waa Deegaanka Balli Reer Cilmi oo oodwayne ka tirsan ayey bari kaga beegan tahay”.

Mar aanu taliyaha waydiinay inay aqoonsadeen diyaaradahan iyo halka ay ka yimaadeen ayaa waxa uu yidhi

“Diyaaradahan mar kaste way maraan oo si toos ah ayey u maraan oo waligoodba way marayeen ,waana wadadooda oo waxay kazoo kacaan Jabuuti oo waxay qabtaan dhinacaas iyo Koonfur oo joog hoose ayay ku socdaan oo dhirta dusheeda ayay maraan markay koonfur ku socdaan marka kalena meel sare ayay maraan oo tobaneeyo cisho ayay maqnaadaan oo guud ahaan waa la aqoonsan yahay diyaaradahan halka laga leeyahay,laakiin anagu hadda xaqiiqada ma sheegi karno oo walina baadhitaano Ayaan wadnaa”.sidaas ayuu yidhi Taliyuhu.

Taliye ku xigeenka Oodwayne Cabdilaahi Diiriye Cilmi ayaa isna dhankiisa noo xaqiijiyay inay diyaaraduhu duqeeyeen isla markaana rasaas ku rideen deegaanka Balliga Reer Cilmi,isla markaana ay wadaan baadhitaano ku saabsan diyaaradahan iyo sababta keentay inay rasaasta ridaan.