Dowlada Iran ayaa sheegtay inay diyaar u tahay xalinta khilaafka u dhaxeeya dowladooda iyo Boqortooyada Sacuudiga.
Wasiir kuxigeenka Arrimaha Dibada ee IRAN Abbas Aragchi ayaa sheegay in dowladiisa ay soo dhaweenayso in heshiis la dhex dhigo labada dal.

“…Wadanka Sacuudiga wuxuu kamid yahay dalalka muhiimka ah ee dunnida Islaamka…”ayuu yiri Wasiirkan walow uu sii raaciyey inuu dowladiisa khalad u aragto go’aanadii horey uga soo baxay dhanka Sacuudiga ee xiriirka loogu jiray wadanka IRAN.

Hadalka Wasiirka ayaa kusoo beegamaya todobaadyo kadib markii wax natiijo ah kasoo bixi waayey kulan ay yeesheen Wafdi ka socday IRAN iyo dowlada Sacuudiga. Wafdiga IRAN ayaa u tagay Sacuudiga arrimaha Xajka iyo sidii loo xalin lahaa tabashooyinka IRAN ee ku aadan nidaamka Xajka.

Arrintan ayaa keentay in shaki la geliyo in sanadkan Xujayda IRAN ay tagi karaan wadanka Sacuudiga.

IRAN ayaa sanadkii hore ku eedaysay dowlada Sacuudiga mas’uuliyad xumo kadib markii boqolaal kamid ah muwaadiniintooda ay ku dhinteen shilkii ka dhacay nawaaxiga magaalada Mina xiligii lagu guda jiray xajka.

Hargeisa Office
Wajaalenews.net
Wariye:Abdiqadir Habane