Hargeysa [Wajaalenews]- Guddoomiyaha Gobolka Maroodi-jeex Ee Xisbiga Mucaaradka
Ah Ee WADDANI Md Siciid Bustaalle, ayaa Shir lagu Dar-dar-galinayo
Hawlaha Xisbiga La Yeeshay Masuuliyiinta Degmooyinka Maxamuud Haybe
iyo Maxamed Mooge.
Shirkan oo saaka ka qabsoomay xarunta xisbigu ku leeyahay gobolka
Maroodi-jeex, isla markaana ay ka soo qaybgaleen masuuliyiinta kala
duwan ee heer degmo ee labadaas degmo. kuwaasoo Guddoomiyuhuna faray
sidii loo dhisi lahaa hogaanka labadaas degmo, isla markaana loo
dardar-galin lahaa hada wixii ka dambeeya hawlaha xisbiga.
Shirkan waxa ku wahelinayey Guddoomiye Siciid, ku xigeenadiisa,
xoghayaha gobolka Mahad Xaaji Faarax, iyo Guddoomiyaha garabka ee
haweenka ee xisbiga WADDANI Marwo hinda Xasan Idiris iyo waliba
masuuliyiin kale oo badan. Kuwaasoo iyaguna dhankooda dardaaran la mid
ah kan Guddoomiyaha oo kale u jeediyey.
Sidoo kale Guddoomiyeyaasha labadda degmo oo iyaguna dhankooda ka
hadlay shirka ayaa sheegay inay aad ugu faraxsan yihiin, isla markaana
ay diyaar u yihiin dardargalinta iyo dhismaha labadan degmo ee Maxamed
Mooge iyo Maxamuud Haybe. Iyagoo xusay inay labadan degmo ka mid
yihiin degmooyinka uu xisbiga WADDANI taageerayaasha ugu ballaadhan ku
leeyahay, isla markaana dhowaan laga arki doono isbadalo xaga shaqadda
ah oo ka bilaabmata degmooyinkan.

Guddoomiye Bustaalle iyo masuuliyiintiisa kale ee garbihiisa ah, ayaa
tan iyo intii loo soo magacaabay guddoonka Gobolka Maroodi-jeex Ee
Xisbiga Mucaaradka Ah Ee WADDANI ku hawlanaa sidii loo dardargalin
lahaa hawlaha xisbiga iyo dhisitaanka masuuliyiinta kala duwan ee
degmooyinka hoos yimaada gobolkan uu masuulka ka yahay. Waxaana la
filayaa inay masuuliyiinta Gobolka Maroodi-jeex ee xisbigu oo uu ugu
horeeyo Guddoomiye Bustaalle inay shirar noocan oo kale ah la yeeshaan
degmooyinka kale ee magaaladda Hargeysa ka kooban tahay ka mid yihiin
Gacan Libaax, Macalin Haaruun, Axmed Dhegax, 31-ka May, Ibraahim
Kood-buur iyo 26-ka Juun.