Hargeysa(Wajaalenews)-Fu’aad Aadan Cadde, ayaa sheegay inaan Xisbiyada Mucaaradka ahi soo bandhigin sabab lagu qanci karo oo ku saabsan qaadacada Diwaangalinta Madaniga ah. Waxa uu sheegay inuu aaminsan yahay in diwaan galintu tahay mid muhiim u ah muwaadiniinta.

“Xisbiyada Mucaaradku markii ay qaadaceen Diiwaangelinta, sababta ay ku qaadaceen may sharaxin, waxayna yidhaahdeen waanu qaadaynay, Dawladduna khiyaamo ayey ka wadataa, khiyamadaasna waxa ay tahay may sheegin, waxa la yidhi Muslinoow run sheeg Muslinoowna run uga qaado, Dawladda waxa ay tidhi waa in la rumaysta, hore ayeyna u sheegtay inay Doorashadu dhacayso, Xisbiyada Mucaaradka ahna waxa aan u soo jeedinayaa in haddii aanay sheegayn sababo Dawladdu keentay oo xidhaya, in aanay qaadicin Diiwaangelinta oo cid walba dan u ah”

Fu’aad waxa muhiim ku tilmaamay Diwaan galinta “Diiwaangellinta lagu qaadanayo Kaadhka Somaliland, waxa ay ila tahay inay fiican tahay in la qaato, oo Bulshada reer Somaliland ay qaataan, si ay u muujiyaan muwaadinimadooda,”.

Fu’aad Aadan Cadde ayaa mar uu ka hadlaayey Doorashada la filayo inay Sannadka dambe dhacdo iyo sida uu u arko waxa uu yidhi “Dawladdu waxa ay tidhi ilaw iyo ilawba Doorashadu wey dhacaysaa, Mucaaradkuna waxa uu rabaa inay Doorashadu ka dhacdo, markaas anigu wax ii muuqda oo joojiya Doorashada ma arko, waxaana qabaa inay Doorashado dhacayso”.

WAJAALENEWS DESK

EMAIL;WAJALENEWS@GMAIL.COM