Hargeysa(Wajaale News):-Wasaarada Arimaha dibada Somaliland ayaa ka hadashay waxa ka soo baxay shir dhawaan magaalada Diridhaba lagu qabtay kaasi oo ay dhinacyada Somaliland iyo Itoobiya ay kaga wada hadlayeen arimo la xidhiidha sidii kor loogu qaadi lahaa ganacsiga ka dhaxeeya labada dal.Waxaana ay sheegtay in ay ka soo baxeen midho wanaagsan oo wax ku ool u ah labad dhinacba.

War-Saxaafadeed ka soo baxay Wasaarada Arimaha Dibada Somaliland oo uu ku saxeexan yahay Siciid Cali Muuse ayaa waxaa uu udhignaa sida tan:

War-Saxaafadeed:
Wufuud 40 xubnood ah oo ka kala socda Somaliland iyo Etoobiya ayaa Bishan July 1dii ilaa 2dii ku shiray magaalada Dire Dhaba ee dalka Etoobiya. Wufuud ayaa ahaa gudiyo dhinaca farsamada ah, oo labada dal ka kala tirsan, waxaana laga wadahadlaayey oo laga heshiiyey, qorshaha ay Etoobiya ku doonaysa in ay isticmaasho dekeda magaalada Berbera ilaa 30% meelaha alaabada xamuulka ah la dhigo ee dekeda, jidka Berbera oo la horumariyo, sidii Somaliland ay awooda korontada uga heli lahayd Etoobiya iyo iskaashi joogta ah oo dhex mara Etoobiya iyo Somaliland. Arrimaha kale ee laga heshiiyey waxa ka mid ah wadahadalo buuxa oo dhinaca ganacsiga ah, arrimaha socdaalka, amaanka iyo nabadgelyada, dhismaha hayadaha iyo tacliinta iyo tamarta. Qodobadaas dhamaantood, ayaa si buuxda looga wadahadlay, iyadoo Etoobiya ay si heer sare shirkan u qabanqaabisay.

Wufuuda shirkan labada dawladood uga qayb gashay oo heer farsamo ahaa, ayaa labada geesood waxay madaxdii kala hogaaminaysay heshiiskaas kala saxiixdeen, iyadoo Duqa magaalada Dire Dhawa uu si kalgacaltooya leh u soo dhoweeyey wefdiga reer Somaliland ee shirkaas ka qayb gelay.

Gunaanadka iyo midhaha ka soo baxay shirkan ayaa ku soo beegmaysa Xili ay labada dal ay xidhan yihiin xuduudahooda ay wadagaan,waxanaa aan la garan doonin sida ay qorshayaashani u noqon doonaan kuwo ambaqaad ka yeesha halka laysla gaadhay.

Hargaysa Office
Wajaale News
Email:habane00@gmail.com
Wariye:Abdiqadir Abdirahman Habane