Somalia(Wajaalenews)Xarakada Al-shabaab oo dowladda Soomaaliya dagaal kula jirta ayaa sheegtay in dagaallo ka dhacay gobollada Galguduud iyo Gedo ay ku dileen ciidammo Itoobiyaan iyo Kenyaan ah.

Afhayeenka howlgalada Al-shabaab, Sheekh C/casiis Abuu-Muscab oo wareysiyo siiyay warbaahinta Al-shabaab ayaa sheegay in dagaal ka dhacay degmada Ceelbuur ee gobolka Galguduud ay ku dileen ciidammo Itoobiyaan ah, kaddib dagaallo socday saddex maalmood oo isku xiga.

Sheekh Abuu-Muscab ayaan sheegin tirade ciidamada Itoobiyaan ah ee ay ku dileen degmada Ceelbuur, balse wuxuu sheegay inay ahaayeen kuwo badan, isagoo aan sheegin khasaaraha dhankooda soo gaaray.

Dhanka kale, afhayeenka howlgallada Al-shabaab oo ka hadlay dagaal isna ka dhacay deegaanka Ceel-cadde ee gobolka Gedo ay ku dileen sarkaal sare oo ka tirsanaa ciidamada ka socda dalka Kenya.

Inkastoo illaa hadda aysan dowladaha Kenya iyo Itoobiya ka hadlin dagaalladii ay Al-shabaab kula galeen gobollada Gedo iyo Galguduud ayaa haddana waxaa jirtay in deegaannadaas ay dagaallo ka dhacayeen maalmihii lasoo dhaafay.

Ciidamada Itoobiya iyo kuwa Kenya ayaa waxay qayb ka yihiin howgalka ay ka wadaan Soomaaliya ciidamada Midowga Afrika ee AMISOM, kuwaasoo ka socda lix dal oo Afrikaan ah.

Al-shabaab ayaa laga qabsaday deegaanno dhowr ah oo ku yaalla Bartamaha iyo Koonfurta Soomaaliya ayaa haddana waxay ka taliyaan deegaanno badan oo ku yaalla Soomaaliya.

Hargeisanews.net

Hargeisa/office