Hargeysa (Wajaale News):-Shirkadda buskudka abu-waladka dalka keenta ee Al-Xarbi ayaa la sheegay in la siiyey labada dhisme ee Gandi Library iyo Boosta dhinaca ku haysa isla markaana Saldhiga dhexe ee Booliska ee magaaladda Hargeysa dhinaca koonfureed dheegga kaga haya.

Maktabada Gaandi ayaa la sheegay in xukuumadda madaxwayne Siilaanyo ku wareejisay shirkadda Ilma Faarax Xarbi ee Al-Xarbi iyadoo dawladii marxuum Cigaal ay ogolaansho u siisay wiil uu dhalay Alle ha u naxariistee Yuusuf Ismaaciil Samater (Gandi) oo ka mid ahaa macalimiintii halganka dheer u gashay waxbarashada Somaliland, kaas oo horaantii 60-kiina wasiir ka noqday xukuumadii Soomaaliya ee wakhtigaasi.

Sidoo kale dukaankii caanka ahaa ee Baani-yaalkii Karasandaas oo labadaas dhisme ee Gandi Library iyo Boosta dhinaca koonfureed kaga taala masaafad 100 talaabo ka yar ayey mulkiilayaasha shirkadda Al-xarbi oo ku andacoonaya in Canada lagaga iibiyey dhismahaasi ay imika isku haystaan, maxkamaddana iskula jiraan mujaahid Faroole oo ka tirsan qoyska Faarax Baani-yaal oo mudo 80 sano ku dhaw wakiil u ahaa ganacsadihii Karasandaas.

Si aanu xogo dheeraad ah uga helno arimahan ayaanu isku daynay inaanu wax ka waydiino dhinacyada ay arrintani khusayso gaar ahaan shirkadda Al-Xarbi iyo wasaaradda hawlaha guud iyo guryeynta ee Somaliland ayaanay noo suurta galin inaanu helno, balse sida ay ilo wareedo lagu kalsoon yahay Haatuf u sheegeen xukuumadda ayaa si rasmi ah u siisey shirkadda Al-xarbi dhismayaashaas oo ay dawladda ugu badashay dhul ku dhaw Maxkamadaha oo hore loogu ogolaaday inay shirkadu masaajid aanay wali dhisin ka yagleesho.

Hargaysa Office
Wajaale News
Email:habane00@gmail.com
Reporter:Abdiqadir Abdirahman Habane