Hargeysa(Wajaale News):-xisbiga mucaaridka ah ee Waddani ayaa maanta munaasibad balaadhan ku soo dhaweeyey   6 xildhibaan oo ka mid ah golaha wakiilada somaliland, kuwaas oo si rasmiya uga mid noqday  xisbigaas.

Munaasibada lagu soo dhawaynayey xildhibaanada oo ka qabsoontay Hotel Ambassador ee magaalada Hargeysa ayaa waxa ka soo qayb galay gudoomiyaha xisbiga mucaaridka ah ee Waddani, gudoomiye ku xigeenka koowaad ee xisbigaasi, xildhibaanada ku soo biirayxisbigaasi iyo marti sharaf kale.

Ugu horayn  waxa munaasibadan ka hadlay xoghayaha guud ee xisbiga Waddani Maxamed Cabdilaahi Uurcade waxaanu sheegay inay soo dhawaynayan xildhibaanada go,aansaday inay ku sii biiraan xisbiga Waddani waxaanu yidhi ? ?waji furan iyo gacmo ayaanu idinku soo dhawaynaynaa  xisbiguna waa xisbigiinii,

xisbigana maaha markii ugu horaysay ee ay xildhibaano ku soo biiraan balse ilaa maalintii la sameeyey xisbiga Waddani xildhibaano ayaa ku soo biirayey, dalkan sadex xisbiga qaran ayaa ka jiray, hada waxa muuqata in xisbiga Kulmiye oo ah xisbigii umadu ku aamintay hogaaminta umada oo xil xisbi iyo xil qaran haya in maalin kasta la arkayo iyaga oo iska hor imanaya oo khilaaf dhexdooda ka tagan yahay, waxaanu aad uga xunahay inay inay ku mashquulaan danta gaarka ah, hore ayaa loo sheegay inay xukuumadana mucaaridnimo xisbigeedu ugu filan yahay, markaa waxaanu leenahay dantiina ka hor mariya danta guud iyo ilaalinta xilka aad haysaan.

Sidoo kale gudoomiye ku xigeenka koowaad ee xisbiga Waddani Axmed Muumin Seed  oo isaguna munaasibadan ka hadlay ayaa soo dhaweeyey xildhibaanadan ku soo biiray xisbiga Waddani ?marka hore waan soo dhawaynaynaa xildhibaanadan ku soo biiray xisbigan, waxaany  ogyihiin xildhibaanadu in xisbiga Waddani uu dhawaan qaban doono talada dalka, waxaanan leeyahay xildhibaanada go,aankaa gaadhay waad mahad san tihiin waxaanna idinku soo dhawaynaynaa qalbi furan, anigana sharaf ayey ii tahay oo labadii xildhibaan ee ugu miisaanka culus gobolka Awdal ayaa maanta ku soo biiray xisbigan aadna waanu ugu faraxsanahay. Ayuu yidhi gudoomiye ku xigeenka koowad ee xisbigaasi Axmed Muumin Seed

Sidoo kale xildhibaanada maanta ku soo biiray xisbiga mucaaridka ah ee Waddani oo ay tiradoodu dhamayd 6 xildhibaan oo guud ahaantoodba ka hadlay munaasibadan lagu soo dhawaynayey ayaa sheegay inay ku midaysan yihiin ku biiritaanka xisbiga Waddani.

Ugu danbayntiina gudoomiyaha  xisbiga Mucaaridka ah ee Waddani Cabdiraxmaan Maxamed Cabdilaahi(Cirro) oo munaasibadan ka hadlay ayaa sheegay inaan xeerarka wadanku ka hor imanayn inay xildhibaanada xisbiyadoodu saaxada siyaasada ka baxaan ay ku biiri karaan xisbiga ay doonaan waxaanu yidhi

sida uu jideeyey xeer no14 mudanayaasha ay xisbiyadoodu dhacday ama ururadii aan ku guulaysan doorashada waxa uu farayaa inay ku biiraan sadexda xisbi kii ay doonaan, waxaynu halkan ku soo dhawaynaynaa mudanayaal markii ay ka baaraan dageen xisbiyada qaranka iyagu iskood go,aansaday inay ka mid noqdaan xisbiga Waddani, qalbi furan iyo gacmo furan ayaanu ku soo dhawaynaynaa mudanayaashaas. Ayuu yidhi gudoomiyaha mucaaridka ah ee Waddani.

Wajaale News
Hargaysa Office
Info:wajalenews@gmail.com
Repoter:Abdiqadir Abdiraxman Habane