Hargeysa, December 1, 2013 (wajaalenews) – Alle ha u naxariistee Gaashaanle sarre Cabdi Caydiid Axmed oo ka tirsanaan jiray Sirdoonka Qaranka Somaliland, isla markaana ka mid ahaa waftiga Madaxwayne Siilaanyo ee socdaalka shaqo ku tagay Magaaladda Gabiley ayaa maanta u geeriyooday wadne-xanuun ku soo booday.

Sarkaalkan geeriyooday ayaa sida la sheegay isaga oo caafimaadkiisu fiican yahay raacay waftiga Madaxwaynaha, kaas oo shalay xiliyadii duhurkii wad-nuhu si kadis ah u xanuunay, isla markaana markii xaaladiisu cuslaatay ay hogaanka Sirdoonka qaranku si degdeg ah ugu soo direen direen Magaaladda Hargeysa, kaas oo Alle ha u naxariistee dhexda ku geeriyooday.

Alle naxariistii jano ha ka waraabiyee Gaashaanle sarre Cabdi Caydiid Axmed ayaa sida ay sheegeen dadka aqoonta u lihi ka mid ahaa saraakiisha ugu hawl-karsan uguna firfircoonaa hay’adda sirdoonka qaranka oo uu mudo dheer ka tirsanaa, isla markaana lagu xasuusan doono shaqo fiicno, kaas oo wakhtigan uu wadne xanuunka u geeriyooday ku gudo-jiray shaqo qaran oo uu ku gudanayey waajibaadkiisa shaqo ee uu qaranka Somaliland ugu xilsaarnaa.

Dhinaca kale Agaasimaha hay’adda sirdoonka qaranka Jaamac Maxamed Bootaan, ku xigeenkiisa Cismaan Maxamed Samater (Liimo) iyo dhamaan hogaanka waaxyaha kala duwan ee hay’adda sirdoonka qaranka ayaa waxay dhambaal Tacsi ah u direen ehelkii, asxaabtii, hay’adda sirdoonka iyo qaranka Somaliland-ba, kuwaas oo ka tacsiyeeyey geeridii naxdinta leh ee ku timid marxuumkaas oo ay ku sifeeyeen shaqsi wanaag iyo hawl-karnimo ku caan ahaa, kuwaas oo Marxuum Cabdi Ilaahay uga beryey inuu naxariistiisii jano ka waraabiyo