Hargeysa(Wajaale News)-Gudoomiyaha rugta ganacsiga Somaliland Md Maxmed Shurkri Jamac oo maanta shir jara’id ku qabtay xafiiskiisa ayaa ka warbixiyay dib udhaca ku yimid wakhtigii loogu talo galay carwadii lixaad
Gudoomiya oo arintaa ka hadlayaa waxu yidhi “Waxay ogaysiinaysaa dhamaan ganacsatada Somaliland gudo iyo dibadba,ganacsatada wadamada jaarka nala ah , kuwa caalamiga ah iyo dhamaan daneeyayaasha kale in carwadii 6aad ee Somaliland ay qabsoomi doonto 01,Dec,2013 ilaa 07,dec,2013.”
Dhanka kale wuxuu ku booriyay ganacsatada in ay ka qayb qaataan hawshaa “Waxayna ka qabsoomi doonta hoolka Hotel Guleed sidaa daraadeed waxaa maaamulka rugta ganacsiga iyo shaqaalaha rugtuba ay gacmo furan ay ku soo dhawaynayaan ganacsatada Somaliland gaar ahaan iyo kuwa aanu jaarka nahay iyo kuwa caalamiga ah iyo cidii danaynaysa in ay ka qayb qaataan.”
Walaalayaal waxaa idinku soo booqandoona haddaad tihiin ganacsatada Somaliland meheradihiina iyo fadhiyadiina hawl wadeeno ka socda rugta ganacsiga oo sita aqoonsigoodii shaqo sidaa daraadeed waxaa maamulka rugta ganacsigu idinka codsanayaa in aad soo dhawaysaan una fududaysaan hawshaa, waayo rugta ganacsigu waa rugtiinii waa hay’adiinii dakhliga aad bixinaysaana wuxuu ku dhacayaa maqalkiina oo ah rugta ganacsiga.
Heshiisyada iyo wixii tafaasiil ah ee aad u baahantihiin ee loogu talo galay dhacdadan waxay diyaar idiinku yihiin xafiiska rugta ganacsiga sdioo kale hawl wadeenadu waxay idiinku keeni karaan xafiisyadiina iyo meheradihiina. Wakhtiga ay carwadu furmayso oo ay inaga xigto bil wax la’ sidaa darted waxaan idin ku boorinayaa ka gudoomiye ahaan in si dhago nugul looga qayb qaato.
Waxaanu ka cudur daaranaynaa maamul ahaan waxaa jirtay in hore loo shaaciyay in 01, Oct, 2013 ilaa iyo 07, oct, 2013 ay carwadu dhici doonto, arintaa dib udhaca waxaa keenta arimo farsamo oo ka baxsan awoodayada sidaa awadeed intaana raaligalin ayaan ka bixinaynaa.

Wajaale News
Hargaysa Office
Info:wajalenews@gmail.com
Repoter:Abdiqadir Abdiraxman Habane