Kenya(Wajaale News):-Booliska dalka Kenya ayaa soo bandhigay labada nin oo ay ciidanku ku toogteen xaafada Islii inay ahaayeen kuwii ka dambeeyay weerarkii lagu dhaawacay xildhibaan Yuusuf Xassan bishii December ee sanadkii lasoo 2012.
Labada nin ayaa lagu dilay wadada 12-ka ee xaafada Islii iyadoo laga helay bistoolad ay xabado ku jiraan iyo bambo gacmeed ay doonayeen inay ku fuliyaan weeraro cusub sida ay sheegeen ciidamada boolisku.
Taliyaha ciidamada booliska ee Nairobi Benson Kibue ayaa sheegay in nimanka la dilay ay ku lug lahaayeen weerarkii lagu qaaday xildhibaanka oo ahaa mid loo adeegsaday bambada gacanta laga tuuro.

Maxamed C/kariim Ismaaciil (Shiine) oo ah maareeyaha degmada Kamakunji islamarkaana goob joog ka ahaa marka la tooganayay nimanka ayaa sheegay in boolisku ay ku wargaliyeen in raggani muddo dheer dabagal ku socday ayna qaadeen weeraro isdaba-joog ah oo loo adeegsaday bambooyinka gacanta laga tuuro.

Waxaana uu sheegay in ay tahay markii ugu horreysay ee boolisku ay tallaabo  noocan oo kale ah qaadeen tan iyo markii xildhibaanka la weeraray sanadkii hore

“Dhowr jeer ayuu xildhibaanku baarlamaanka ka sheegay in aan waxba laga qaban weerarkii lagu qaaday isaga waana markii ugu horreysay ee booliska ay tallaabo qaadeen” ayuu yidhi Shiine oo sidoo kale kamid ah raga sida dhow ula shaqeeya xildhibaanka.
Shiine ayaa sheegay in ragga la toogtay aysan Soomaali ahayn oo ay ahaayeen Keenyaanka kale taasoo muujinaysa inaysan Soomaalidu wax lug ah ku lahayn weeraradii isdaba-joogga ahaa ee ka dhici jiray xaafada Islii ee Soomaalidu ay ku badantahay kuwaasoo intooda badan loo adeegsaday bambooyinka gacanta laga tuuro,laguna tuhunsanaa somalida.Xildhibaan Yuusuf Xassan oo wali la tacaalayay siduu uga kici lahaa dhaawacii gaadhay oo lugaha ka haleelay ayaa iminka ku sugan magaalada New York oo looga saaray biro lugaha laga galiyay.

Wajaale News
Hargaysa Office
Info:wajalenews@gmail.com
Reporter: Abdiqadir Abdiraxman Habane