Boorama(WJN)  Shirkada Kaluumaysiga ee Pontus Marine ayaa maanta dadka reer Boorama u soo bandhigay qorshe ay kaga mid noqonayaan dadka maalgashanaya shirkadan dhinaca kaluumaysiga ah oo ka hawl gali doonta Somaliland. Madashan ayaa waxa ka soo qayb galay Lataliyaha Madaxwaynaha ee dhinaca Haweenka, maayarka Boorama, ganacsato, Cuqaal iyo dadwayne kale.

Ugu hiorayn ayaa waxa halkaasi ka hadalay Mudane Maxamed Guuleed Liibaan oo ah CEO-ga Guul Group oo ka wakiil ah shirkadan Pontus Marine, waxana uu ka waramay shirkadu waxa ay qabanayso iyo siyaabaha loo maalgashanayo waxana uu yidhi “Waxa aan maanta keenay Boorama Shirkada kaluumaysiga ee Pontus Marine oo aan doonayno inay dadka reer Awdal ka qayb qaataan maalgalinteeda, shirkadu waa mid ka hawl gali doonta Somaliland kana shaqayn doonta kaluumaysiga iyo iibgayntiisaba, waxa ay shirkadu xarumo ku yeelanaysaa magaalada Maydh oo ah meesha uu dalkeena kaluunku ugu badan yahay iyo Berbera oo noqondoonta meesha kaluunka laga dhoofin doono, sidaasi aawadeed, waxa aan u sheegaynaa ganacsatada iyo dadka kale ee danaynaya inay ka qayb qaataan maalgashiga shirkadan, in uu furan tahay isla markaana ugu yaraan lagu darsanayo $500 ugu badnaana lagu darsan doono $500,000, lacagtaas oo dhana waxa lagu shubi doonaa Dahabshiil ama Salaama Bank”

Maayarka Boorama Saleebaan Xasan Xadi oo isaguna halkaasi ka hadlay ayaa yidhi “Waxa ay tani iila muuqataa fursad balaadhan oo dalka lagu maalgalinayo, waxana aan ganacsatada reer Awdal ugu baaqayaa inay ka qaybqaataan oo ay maalgashadaan isla markaana waqti lasiiyo oo ay ka soo fikiraan balse hormood u noqdaan maalgashigaashi shirkadan kaluumaysiga ee Pontus Marine”

Lataliyaha Madaxwaynaha ee Arimaha Haweenka Marwo Amaal Xaaji Axmed Miisaan oo iyaduna ka hadashay halkaasi ayaa waxa ay si gaar ah ula dardaarantay dadka reer Awdal waxana ay tidhi “Waxaa la gaadhay waqtigii ay dadka reer Awdal la iman lahaayeen dhiiranaan ku aadan dhinaca maalagashiga dalka, waxa aan leeyahay fursadan ka faaiidaysta, waxa aan hubaa inay tahay mid wax ka taraysa shaqo abuurka iyo yaraynta tahriibta dhalinta, waxa aan leeyahay waan soo dhawaynaynaa cid walba oo maalgashanaysa shirkadan kaluumaysiga ee Pontus Marine”

Qaar ka mid ah Ganacsatada, Aqoonyahanka iyo Odayshaqameedka ayaa iyaguna soo dhaweeyay shirkadan kaluumaysiga ee Pontus Marine, waxana ay dalbadeen in loo baahan yahay inay dib u soo akhriyaan document-ka ka xog waramaya shirkadan isla markaana ay u soo diyaar noqon doonaan maalgashiga shirkadan.

WAJAALE NEWS DESK

BORAMA OFFICE

CONTACT US : Wajalenews@gmail.com