Nairobi (Wajaale News)- Madaxweynaha dalka Kenya Mr. Uhuru Kenyatta, ayaa shaaciyey xiliga uu ciidamadiisa kala baxayo gudaha waddanka Soomaaliya oo ay galeen ku dhowaad laba sanno ka hor, iyagoo haatanna qeyb ka ah ciidammada Midowga Afrika ee AMISOM.

Madaxweyne Uhuru Kenyatta oo saxaafadda ugu warramay magaalada Nairobi, ayaa sheegay in ciidammadiisu ka bixi doonaan gudaha Soomaaliya marka nabad iyo kala dambayn joogto ah ka hirgasho dalkaas, isla markaana laga cidhibtiro ururka Al-shabaab oo uu xusay inay khatar ku tahay ammaanka dalalka Geeska Afrika.
Waxa kale oo uu sheegay in xukuumaddiisu xoojinayso qalabka ammaanka lagula socdo ee lagu xidhayo goobaha muhiimka ah sida xafiisyada Qarammada Midoobay ee Nairobi ku yaal iyo meel kasta oo muhiim ah.

Waxaan xaqiijinaynaa ammaanka dalkeenna innagoo kaashanayna UN-ka, ujeeddaduna waa in la xaqiijiyo ammaanka guud ahaan shacabkeenna. Waxaanan kordhinaynaa la socodka ammaanka, ayuu yidhi Madaxweyne Kenyatta, isagoo sidoo tilmaamay in weerarkii lagu qaaday rugta ganacsiga ee Westgate Mall bishii hore aannu joojin doonin hawlaha ay dawladdiisu qaybta ka tahay ee lagu doonayo in lagu soo celiyo ammaanka Soomaaliya.

?Kenya marna kama baaqsan doonto dagaalka ay kula jirto argagaxisada caalamiga ah. Waxaan sii wadaynaa wadashaqeynta nagala dhexeysa kuwa aan saaxiibbada nahay si loo burburiyo argagaxisada,? ayuu yidhi Madaxweyne Uhuru.

Madaxweynaha Kenya ayaa dhinaca kale saxaafadda dalkiisa  ku eedeeyey inay si fool xun u tebiyeen weerarkii bishii hore ka dhacay xarunta Westgate ee magaalada Nairobi, isagoo xusay in ilaalin waayeen dareenkii murugada lahaa ee heystay eheladii dadkooda ku waayey weerarkaas Al-shabaab ka fulisay gudaha magaalada Nairobi.

Wajaale News

Hargaysa Office

Info:wajalenews@gmail.com

Repoter:Abdiqadir Abdiraxman Habane