Hargeysa (Wajaale News)- Guddi ka tirsan baarlamaanka Somaliland ayaa kormeer xaqiiqo raadin ah ku soo marey xarumaha ay ka socdaan sahaminta shidaalka ee Somaliland.
Xubnaha guddigaasi ayaa haatan dib ugu soo laabtey magaalada Hargeysa markii ay dhamaysteen kormeerkooda.

Weriyaha VOA ee magaalada Hargeisa Ismaaciil Xuseen Farjar ayaa la kulmay, wareysina la yeeshey Guddoomiyaha Guddi-hoosaadka Khayraadka Dabiiciga ah ee Golaha wakiillada Xildhibaan Siciid Maxamed Cilmi oo horkacayey guddiga.

Xildhibaanka ayaa sheegay inay soo kormeereen hawlaha sahaminta shidaalka ee ka socda Bariga Somaliland, isaga oo tilmaamay inay hawsha sahamintu si wanaagsan u socoto.

Xildhibaanka ayaa VOA u sheegay inay guddigoodu warbixin u gudbinayaan Baarlamaanka.

Isaga oo ka jawaabaya hadal ka soo yeedhay dawlad goboleedka Puntland oo ugu baaqday Somaliland inaan shidaal laga qodin dhulka ay labada dhinac isku haystaan, ayaa waxa u xildhibaan Siciid Maxamed Cilmi uu tilmaamay daandaasi iyo faragalin.

Xigasho: VOA